– Një ngjarje e rëndë është regjistruar në Selanik. Raportohet se një grua hodhi veten në erë me një bombë që me sa duket kishte ndërmend ta përdorte për të hedhur në erë një bankomat.
Mediat greke raportohen se 38-vjeçarja u dërgua në spital, por vdiq nga plagët e marra. Policia ka përjashtuar menjëherë një motiv terrorist, pasi gruaja njihej nga drejtësia pasi ajo ka kryer grabitje të mëparshme dhe kishte vuajtur dënime me burg. Policia tha se dyshonte se bomba shpërtheu në duart e saj para se ajo të mund ta vendoste atë në bankomat.
”Pamjet nga kamerat e monitorimit e mbështesin këtë teori”, tha policia.
Banorët vendas raportuan një shpërthim të madh që u ndje si një tërmet. Gruaja u transferua në spitalin ”Ippokrateio”, por ajo u shpall e vdekur në spital. Policia ka rrethuar zonën e shpërthimit për të mbledhur prova. Shpërthimi shkaktoi dëme në vitrinat e dyqaneve si dhe te disa automjete të parkuara./E.S
