Si mund të parashikohen ngjarjet e mëdha globale nga porositja e picave? Duket se ka një teori dhe për këtë, dhe ndryshe nga teoritë e tjera kjo ka rezultuar e suksesshme në disa parashikime.
“Pizza index”, apo indeksi i picave, është një teori në Shtetet e Bashkuara të Amerikës që parashikon se në botë do të ndodhin zhvillime të mëdha, kryesisht brenda 24 orëve, dhe që përgjithësisht kanë të bëjnë me luftën.
Kjo llogaritet bazuar në frekuencën e porosive të ushqimit natën vonë, veçanërisht picave, nga personeli qeveritar, kryesisht ata në Pentagon dhe Shtëpinë e Bardhë. Teoria thekson se rritje të tilla ndodhin kur zyrtarët parashikojnë ngjarje të rëndësishme si veprimet ushtarake, duke kërkuar që ata të qëndrojnë në punë për orë të zgjatura.
Ky fenomen u vu re për herë të parë gjatë Luftës së Gjirit të vitit 1991 dhe që atëherë është vërejtur gjatë krizave të ndryshme ndërkombëtare.
Supozimi kryesor është se punonjësit qeveritarë, kur përballen me situata urgjente, porosisin ushqim nga lokalet aty pranë, duke çuar në rritje të dukshme të aktivitetit në këto biznese.
Mjete si Google Maps mund t’i gjurmojnë këto anomali në kohë reale, duke ofruar një pamje të ritmit operativ të agjencive qeveritare.
Ndërsa disa analistë e shohin këtë si një sistem të besueshëm paralajmërimi të hershëm, të tjerë paralajmërojnë kundër interpretimit të tepruar, duke sugjeruar se modele të tilla mund të jenë rastësore ose të ndikuara nga faktorë të jashtëm.
Kohët e fundit, Indeksi i Pizza-s ka fituar vëmendje të re mes tensioneve në rritje midis Izraelit dhe Iranit.
Raportet tregojnë se natën e sulmit të papritur të Izraelit ndaj Iranit, i cili përfshinte sulme ndaj objekteve bërthamore dhe vrasje të udhëheqësve ushtarakë, pati një rritje të ndjeshme të porosive të picave në “District Pizza Palace”, të vendosur pranë Pentagonit.
Kjo rritje u vu re afërsisht një orë para fillimit të sulmit, duke bërë që disa të heqin një paralele me rastet e kaluara ku rritja e porosive të ushqimit i parapriu ngjarjeve të mëdha gjeopolitike.
Departamenti i Mbrojtjes i SHBA-së e ka minimizuar teorinë, duke deklaruar se punonjësit kanë qasje në opsionet e ushqimit të brendshme dhe duke theksuar nevojën për analiza të hollësishme për të ndarë sinjalet e vërteta nga zhurma.
Edhe në 24 oët e fundit, teksa presidenti amerikan Donald Trump paralajmëroi iranianët të evakuohen nga Teherani dhe u largua më herët nga takimi i G7 duke urdhëruar mbledhjen e stafit në “Dhomën e Luftës”, porositë e picave nga piceritë pranë pentagonit dhe Shtëpisë së Bardhë kanë arritur majat./e.t
