Presidenti Donald Trump ka paralajmëruar se Shtetet e Bashkuara mund të godasin sërish uzinat bërthamore të Iranit “nëse është e nevojshme”.
Trump e bëri këtë paralajmërim në një postim në rrjetet sociale të hënën në mbrëmje, pasi ministri i Jashtëm i Iranit, Abbas Araghchi, deklaroi për Fox News se Teherani nuk mund të heqë dorë nga programi i pasurimit bërthamor, pavarësisht dëmeve të shkaktuara nga bombardimet amerikane muajin e kaluar.
“Po, është ndalur sepse dëmet janë serioze dhe të mëdha. Por nuk mund të heqim dorë nga pasurimi, sepse është një arritje e shkencëtarëve tanë. Tashmë është edhe një çështje krenarie kombëtare,” tha Araghchi.
Në platformën e tij Truth Social, Trump iu referua deklaratave të Araghchi-t për dëmtimin e centraleve bërthamore dhe u shpreh: “Sigurisht që po, siç e kam thënë, dhe do ta bëjmë sërish, nëse është e nevojshme!”
Sulmet e SHBA-së më 22 qershor goditën tre qendra të pasurimit bërthamor iranian — Fordow, Natanz dhe Isfahan — gjatë konfliktit 12-ditor midis Izraelit dhe Iranit.
Disa ditë pas njoftimit për një armëpushim të ndërmjetësuar nga SHBA-ja, Trump pretendoi se sulmet kishin “shkatërruar plotësisht” uzinat bërthamore iraniane.
Megjithatë, ky pretendim u vu në dyshim nga një raport i mëvonshëm i inteligjencës amerikane, i cili tregoi se programi bërthamor i Iranit ishte penguar vetëm për disa muaj.
Shtëpia e Bardhë e kundërshtoi me forcë këtë vlerësim, duke e quajtur atë “plotësisht të gabuar”.
Postimi i Trump erdhi pas njoftimit të Iranit të hënën se të premten do të zhvillohen bisedime të reja me vendet evropiane për programin e tij bërthamor.
Takimi në Stamboll do të jetë i pari që prej armëpushimit midis Izraelit dhe Iranit në fund të muajit të kaluar, dhe vjen pas diskutimeve të ngjashme në të njëjtin qytet në maj.
Në bisedime do të marrin pjesë zyrtarë iranianë, përfaqësues nga Mbretëria e Bashkuar, Franca dhe Gjermania – të njohura si vendet E3 – si dhe shefja e politikës së jashtme të Bashkimit Evropian.
“Tema e bisedimeve është e qartë: heqja e sanksioneve dhe çështjet që lidhen me programin bërthamor paqësor të Iranit,” tha të hënën zëdhënësi i Ministrisë së Jashtme iraniane, Esmail Baghaei.
Sipas marrëveshjes së vitit 2015 për kufizimin e aktiviteteve bërthamore të Iranit, e njohur si Plani i Përbashkët Gjithëpërfshirës i Veprimit (JCPOA), Teherani pranoi kufizime të rrepta në këmbim të lehtësimit të sanksioneve ndërkombëtare.
Kjo marrëveshje filloi të shpërbëhej në vitin 2018, kur SHBA u tërhoq dhe rivendosi një sërë sanksionesh.
Vendet evropiane së fundmi kanë kërcënuar se mund të aktivizojnë mekanizmin e “rikthimit” të marrëveshjes së vitit 2015, që do të çonte në rikthimin e sanksioneve në rast të mosrespektimit nga ana e Iranit. m.p.
