Skuadrat shqiptare vijojnë përgatitjet për raundin e tretë kualifikues në Conference League, por këtë të hënë kanë njohur kundërshtarët e play-off, që është dhe stacioni vendimtar për të shkuar në grupe.
Kampionët e Superligës shqiptare, Egnatia në rast se arrin të mposhtë Olimpijan, shorti i ka servirur një ekip të fortë si Noah e Armenisë ose në rastin më të mirë Red Imps i Gjibraltarit, pasi këto dy ekipe përballen me njëra-tjetrën.
Dinamo City e Ilir Dajës ka një duel të vështirë në raundin e tretë, atë ndaj Hajduk Split dhe në rast se arrin të kalojë më tej, në play-off përballet me fituesin e çiftit Silkeborg-Jagiellonia. Sa i përket skuadrave të Kosovës, Ballkanin e pret një short i vështirë, por përpara se të shkojë në stacionin final, do të duhet të mposhtë Shamrock Rovers. Në rast se ia del, atëherë në play-off përballet me fituesin e duelit Larne-Santa Clara.
Kampionët e Kosovës, Drita në rast se eliminohen nga Europa League në përballjen me Steauan e Bukureshtit, në Conference do të luajnë ndaj Differdange ose Levadia Tallin, konkretisht me fituesin e këtij çifti. Në rast se avancon më tej në Europa League duke mposhtur Steauan, atëherë e pret Aberdeen.
Shkëndija e Tetovës përballet me Qarabag në raundin e tretë të Champions, por në rast humbje, kalon në Europa League ku në play-off e pret fituesi i çiftit Ludogorets-Ferencvarosi. m.p.
