Vladimir Putin është nisur drejt Alaskës për takimin kokë më kokë me homologun amerikan Donald Trump, dhe bisedime që synojnë gjetjen e një zgjidhjeje të mundshme për fundin e konfliktit gati 4-vjeçar në Ukrainë.
Por takimi i sotëm nga i cili Kievi është përjashtuar-, po ndiqet me shqetësim nga ukrainasit. Liderët europianë, të cilët gjithashtu janë lënë jashtë bisedimeve, druhen se marrëveshja e mundshme nga ky takim mund ta lërë Ukrainën në pozitë më të dobët ose t’i minojë aftësitë e Europës për ta mbështetur vendin e përballur me agresionin e Rusisë.
Për shumëkënd, bisedimet e drejtpërdrejta me Uashingtonin – ku nuk është ftuar Ukraina – kujtojnë Konferencën e Jaltës të vitit 1945, ku Bashkimi Sovjetik, Shtetet e Bashkuara dhe Britania pothuajse ndanë mes tyre Europën e pas Luftës së Dytë Botërore.
Gjatë një takimi me zyrtarë të lartë të Kremlinit, Putini shfaqi optimizëm për takimin në Alaskë dhe sugjeroi se një marrëveshje e re për kontrollin e armëve mund të jetë në proces. Shtëpia e Bardhë po bën “përpjekje mjaft energjike dhe të sinqerta për të ndaluar armiqësitë” dhe për të “arritur marrëveshje që janë me interes për të gjitha palët e përfshira”, tha ai.
Por pretendimet e Trumpit se për t’i dhënë fund konfliktit Moska dhe Kievi do të duhet të shkëmbejnë territore, kanë shqetësuar thellësisht ukrainasit, të cilët nuk zotërojnë asnjë pjesë toke të Rusisë./kb
