Në vitin 1940, Lufta e Dytë Botërore kishte hyrë në një fazë vendimtare. Pas pushtimit të Francës në qershor, Britania e Madhe mbeti e vetme përballë Gjermanisë naziste. Adolf Hitleri nisi “Betejën e Britanisë” – një fushatë ajrore masive që kishte për qëllim thyerjen e moralit britanik dhe detyrimin e qeverisë së Ëinston Churchill-it të negocionte paqe.
Sulmet mbi Londrën dhe simbolet mbretërore
Nga shtatori 1940, Londra filloi të goditej çdo natë nga bombardimet gjermane, të njohura si “The Blitz”. Objektivat kryesore ishin portet, uzinat, hekurudhat, por edhe simbolet e shtetit britanik. Midis tyre, në shënjestër u vu edhe Buckingham Palace, rezidenca zyrtare e familjes mbretërore.
Më 13 shtator 1940, në mes të ditës, në një nga bombardimet më të njohura, një formacion avionësh gjermanë lëshoi bomba mbi pallat. Një nga ato ra në oborrin e brendshëm, duke shkatërruar kapelën mbretërore, duke dëmtuar rëndë pjesë të tjera të ndërtesës dhe duke plagosur disa shërbyes.
Në momentin e sulmit, në pallat ndodheshin Mbreti George VI dhe Mbretëresha Elizabeth (më vonë e njohur si “Nëna Mbretëreshë”). Ata i shpëtuan për mrekulli bombardimit. Vetë Mbretëresha Elizabeth tha më pas:
“Jam e lumtur që tani kemi marrë dhe ne një goditje. Kjo më bën të ndihem se mund t’i shikoj njerëzit e East End-it në sy.”
Ky qëndrim heroik i familjes mbretërore, që nuk u largua kurrë nga Londra gjatë Blitz-it, ndikoi fuqishëm në rritjen e moralit kombëtar.
Simbol i rezistencës
Bombardimi i Buckingham Palace nuk e thyeu shpirtin e britanikëve; përkundrazi, ai u kthye në një simbol të qëndresës kombëtare. Shumë londinezë, që vetë kishin humbur shtëpitë e tyre në bombardime, e panë këtë sulm si një shenjë që edhe mbretërit po ndanin fatin e popullit.
Në total, gjatë Blitz-it (1940–1941), rreth 43,000 civilë britanikë humbën jetën dhe mbi 1 milion shtëpi u shkatërruan vetëm në Londër. Por, pavarësisht kësaj, Hitleri nuk arriti të thyente rezistencën britanike.
Përgatiti: L.Veizi
