Presidenti i Shteteve të Bashkuara, Donald Trump, ka urdhëruar vendosjen e trupave amerikane në Portland, Oregon, duke e cilësuar qytetin si një “zonë të shkatërruar nga lufta” dhe duke paralajmëruar përdorimin e “forcës së plotë” nëse situata e kërkon.
Në një postim në platformën e tij sociale Truth Social, Trump deklaroi:
“Po udhëzoj Sekretarin e Luftës, Pete Hegseth, të sigurojë të gjitha trupat e nevojshme për të mbrojtur Portlandin e shkatërruar nga lufta. Çdo objekt i ICE që ndodhet nën rrethim nga sulmet e Antifas dhe terroristëve të tjerë vendas, do të mbrohet me çdo kusht”.
Edhe pse presidenti autorizoi përdorimin e “forcës së plotë”, nuk është e qartë nëse do të përfshihet Garda Kombëtare apo forcat e rregullta të ushtrisë. Termi “Forca e Plotë” mbetet i paqartë, por analistët paralajmërojnë se kjo mund të nënkuptojë përshkallëzim të madh të pranisë ushtarake në qytet.
Më herët gjatë javës, Trump nënshkroi një urdhër ekzekutiv që përcakton Antifa-n si një organizatë terroriste vendase, duke e akuzuar për trazirat dhe dhunën që ka shpërthyer në disa qytete amerikane.
Vendimi i presidentit pritet të ngjallë reagime të forta politike dhe shoqërore. Opozita ka paralajmëruar se një veprim i tillë rrezikon të përshkallëzojë edhe më shumë tensionet, duke e kthyer Portlandin në një vatër të hapur përplasjeje mes autoriteteve dhe protestuesve.
