Nxitja e ndihmësve kryesorë të presidentit Donald Trump për të larguar Nicolás Maduro-n nga posti i udhëheqësit të Venezuelës është intensifikuar ditët e fundit, raporton New York Times.
Sipas gazetës, zyrtarët e administratës po diskutojnë një fushatë të gjerë që do të përshkallëzonte presionin ushtarak për ta detyruar atë të largohet.
Fushata po drejtohet nga Marco Rubio, sekretari i Shtetit dhe këshilltari i sigurisë kombëtare.
Rubio argumenton se Maduro është një udhëheqës i paligjshëm që mbikëqyr eksportin e drogës në Shtetet e Bashkuara, gjë që ai thotë se përbën një “kërcënim të menjëhershëm”.
Në javët e fundit, ushtria amerikane ka nisur sulme vdekjeprurëse ndaj anijeve civile që administrata tha se po kontrabandonin drogë për bandat venezueliane.
Por Rubio po formëson një strategji më agresive, duke përdorur inteligjencën e ofruar nga CIA, thanë zyrtarët për NYT-në.
Pentagoni ka ndërtuar një forcë prej më shumë se 6 mijë e 500 trupash në rajon.
Drejtori i agjencisë së inteligjencës, John Ratcliffe, dhe Stephen Miller, këshilltari kryesor i politikës së brendshme të Trump, mbështesin të dy qasjen e Rubio-s, shtuan zyrtarët për gazetën amerikane.
Ushtria amerikane ka planifikuar operacione të mundshme ushtarake që synojnë të dyshuarit për trafik droge në Venezuelë si një fazë tjetër, megjithëse Shtëpia e Bardhë ende nuk e ka miratuar një hap të tillë, thonë zyrtarë aktualë dhe ish-zyrtarë për NYT-në.
Meqenëse zyrtarët e administratës pohojnë se Maduro është në krye të rrjetit të karteleve të Venezuelës, ata mund të argumentojnë se largimi i tij nga pushteti është në fund të fundit një operacion kundër narkotikëve.
Rubio citon vazhdimisht padinë e Departamentit të Drejtësisë të vitit 2020 kundër tij dhe zyrtarëve të tjerë venezuelianë për akuza për trafik droge.
Kohët e fundit ai e përshkroi Maduro-n si një “të arratisur nga drejtësia amerikane” dhe kreun e “një organizate terroriste dhe organizate të krimit të organizuar që ka pushtuar një vend”.
Në të njëjtën kohë, dy figura të larta në opozitën e Venezuelës thonë se lëvizja e tyre ka planifikuar se çfarë duhet të bëjë nëse Maduro rrëzohet dhe kanë biseduar me administratën Trump rreth kësaj mundësie./e.t
