Shoqata për Mbrojtjen e të Drejtave të Futbollistëve të Kosovës ka marrë një nismë për t’i ardhur në ndihmë portierit të skuadrës së Trepçës, Arben Beqirit, i cili mësohet se është diagnostifikuar me tumor në stomak.
Ky lajm, i cili u bë publik nga vetë futbollisti ka tronditur të gjithë opinioni sportiv.
Përmes një njoftimi për mediet, kjo shoqatë ka bërë me dije se është hapur një llogari bankare në të cilën ftohen të gjithë të kontribuojnë me sa munden.
Komunikata zyrtare e SHMDFK:
Sot më 14 janar 2020, prej orës 12:00, në sallën e konferencave të FFK-së dhe në prani të medieve e portaleve vendore, Bordi i Shoqatës për Mbrojtjen e të Drejtave të Futbollistëve të Kosovës mbajti takimin informues me kapitenët e ekipeve të futbollit të Superligës së Kosovës, në lidhje me hapat konkrete që do t’i ndërmarrim për t’i dalë në ndihmë shokut dhe kolegut tonë Arben Beqirit, portierit në klubin futbollistik Trepça ’89, i diagnostikuar me tumor në lukth.
Në këtë takim u mor vendim që në mënyrë të organizuar ta ndihmojmë financiarisht Arbenin.
Ndihma financiare do të bëhet përmes xhirollogarisë së Shoqatës për Mbrojtjen e të Drejtave të Futbollistëve të Kosovës me numër XK051971002104031174.
Me këtë rast, ftojmë edhe të gjithë dashamirët e futbollit dhe shoqërinë vendore me vullnet të mirë që t’i bashkohen kësaj iniciative dhe t’i dalim Arbenit krah përgjatë kësaj sfide shëndetësore.
Me nderime Visar Zogiani, Kryetar i Shoqatës për Mbrojtjen e të Drejtave të Futbollistëve të Kosovës./Fjala.al/
