27-vjeçari i Manchester City, Benjamin Mendy, akuzohet se ka përdhunuar tri femra në shtëpinë e tij në Cheshire, midis tetorit 2020 dhe gushtit 2021. Louis Saha Matturie, 40 vjeç, nga Salford, gjithashtu u paraqit në gjykatë, i akuzuar për katër përdhunime.
Asnjërit prej tyre nuk iu kërkua të paraqiste ndonjë deklaratë në seancën e djeshme gjyqësore, por u vijua paraburgimi. Ata do të dalin para gjykatës edhe më 15 nëntor, ndërsa seanca e gjykimit është caktuar për më 24 janar.
Avokati mbrojtës i Mendy tha se do t’i hedhë poshtë akuzat ndaj klientit të tij edhe në seancën e nëntorit. Sulmet e dyshuara, ndaj tri femrave të ndryshme, duke përfshirë njërën nën 18 vjeç, thuhet se kanë ndodhur në adresën e shtëpisë së tij, në Prestbury.
Mendy foli vetëm për të konfirmuar emrin e tij gjatë seancës 45-minutëshe të së premtes, teksa u kthye përsëri në qeli. Lirimi i tij me kusht u refuzua muajin e kaluar dhe aktualisht është në paraburgim në “HMP Altcourse”, në Liverpool.
Francezi ka luajtur për kampionët e sezonit të kaluar në Premier League, Manchester City, që nga viti 2017, kur mbërriti aty nga Monako për 52 milionë stërlina. Ai u pezullua nga klubi, pasi u akuzua nga policia, në pritje të një hetimi të plotë.
