Ka përfunduar pas më shumë se 1 orë takimi i liderëve të G7, ku u diskutua mbi përgjigjen e përbashkët të G7 ndaj sulmit rus në Ukrainë.
Në këtë takim morën pjesë presidenti i SHBA Joe Biden, kancelari gjerman Olaf Scholz, kryeministri i Kanadasë, Justin Trudeau, presidenti i Francës, Emmanuel Macron, kryeministri i Italisë, Mario Draghi, kryeministrja e Japonisë, Kishida Fumio, kryeministri i Britanisë së Madhe, Boris Johnson, presidentja e Komisionit Evropian, Ursula von der Leyen, presidenti i Këshillit Evropian, Charles Michel dhe sekretari i Përgjithshëm i NATO-s, Jens Stoltenberg.
Në një deklaratë të përbashkët pas takimit virtual, udhëheqësit e G7 thanë se presidenti rus Vladimir Putin ka rifutur luftën në kontinentin evropian dhe e ka vendosur veten në anën e gabuar të historisë.
“Ne dënojmë Presidentin Putin për refuzimin e tij të vazhdueshëm për t’u përfshirë në një proces diplomatik për të adresuar çështjet që kanë të bëjnë me sigurinë evropiane, pavarësisht ofertave tona të përsëritura. Ne qëndrojmë të bashkuar me partnerët, duke përfshirë NATO-n, BE-në dhe vendet e tyre anëtare, si dhe Ukrainën dhe mbetemi të vendosur për të bërë atë që është e nevojshme për të ruajtur integritetin e rendit ndërkombëtar të bazuar në rregulla”, thuhet në deklaratë.
