Diskutimet në seancën plenare kanë nisur me debate të forta për shkak të kërkesës për ngritjen e një Komisionit Hetimor Parlamentar për shembjen e godinës së Teatrit Kombëtar. Kërkesa është bërë nga Ralf Gjoni, deputet i Grupit Parlamentar të Pavarur.
Gjoni e konsideroi të paligjshëm vendimin për shembjen e godinës, ndaj kërkon një hetim parlamentar për këtë çështje.
Kreu i Parlamentit, Gramoz Ruçi kërkoi nga Ralf Gjoni që të depozitojë kërkesën për komisionin.
I njëjti qëndrim është mbajtur edhe nga Taulant Balla, kreu i Grupit Parlamentar të Partisë Socialiste.
“Unë e kam shprehur dakordësinë e plotë dje, ku kam mbështetur kërkesën e ardhur institucionalisht nga opozita. Bashkë me kolegen Hajdari dhe kolegë të tjerë, kemi mbështetur këtë kërkesë dhe mezi e presim, por aq të kujdesshëm dhe të vëmendshëm jeni ju, që kërkesa s’ka ardhur akoma. Faleminderit dhe ruani qetësinë se dashuria mbaroi”, u shpreh Balla.
Sot u bë me dije se SPAK ka nisur hetimet për shembjen e godinës së teatrit, ndërkohë që në orën 11 do të zhvillohet një protestë e Aleancës për Mbrojtjen e Teatrit përpara Prokurorisë së Përgjithshme.
