Skandalet e njëpasnjëshme të ngacmimeve dhe abuzimeve seksuale në shkollat e Shqipërisë, ministrja e Arsimit, Besa Shahini, i ka justifikuar me mentalitetin e burrave shqiptarë. Në fjalën e mbajtur në Kuvend, Shahini bëri përgjegjës burrat për ngacmimet dhe gratë që nuk i denoncojnë këto ngacmime.
“Më gjeni një grua që nuk është ngacmuar seksualisht në rrugë, në shkollë dhe në punë, me qëllim për t’u ofenduar. Gati gjysma e popullatës është ngacmuar njëherë në jetë, prap janë burrat që vazhdojnë ngacmojnë dhe prap gratë nuk denoncojnë”, tha Shahini.
Sa i përket skandalit më të fundit të një nxënëse të dhunuar seksualisht nga roja i shkollës në Tiranë, Shahini tha: “Ministria e Arsimit nuk do të prononcohet për raste specifike të abuzimit pasi kjo ndikon në riabuzimin duke identifikuar viktimën”.
Në pjesën kryesore të fjalimit, ministrja Shahini u fokusua në kritikat për organizatat e shoqërisë civile dhe mediat në Shqipëri që, sipas saj, nuk bëjnë aq sa duhet për të mbrojtur grupet e brishta dhe madje ndikojnë abuzivisht në identifikimin e viktimave të dhunës seksuale.
