Ministri i Shtetit për Diasporën, Pandeli Majko deklaroi se nëse nuk do të ishin emigrantët, ekonomia shqiptare do të binte më keq se në krizën e vitit 1997.
I ftuar në emisionin ‘Real Story’, Majko sqaroi se gjithë oksigjeni i ekonomisë shqiptare lidhet absolutisht me remitancat.
“Tani ne po integrohemi në një mënyrë të padukshme nga shtetasit tanë jashtë vendit. Ata vijnë në pushimet e verës, dërgojnë paratë. Ekonomia e shqiptarëve, t’i heqësh tullën e remitancave, bie më keq se në krizën e ’97-ës. Gjithë oksigjeni i ekonomisë shqiptare lidhet absolutisht me remitancat.
Kur e fillova kishte vetëm një nen për interesat e diasporës, sot që flasim ka shumë ndryshime. Është në histori politike shtetërore, që ka ndryshuar. Kjo u tregua më shumë gjatë kohës së koronavirusit. Njerëzit panë mjek, ekspertë, personalitete, studiues, që folën në kushtet e izolimit.
Në fakt këta janë vetëm maja e ajsbergut. Janë mbi 600 mijë shqiptarë që kanë pasaportat e vendeve jashtë. Zërat po vijnë të fortë se iu takon e drejta e votës. Për këtë ne si palë duhet të jemi të kujdesshëm të mos vrapojmë. Unë mund të kem disa çështje të ndryshme nga Damiani, por ai është përfaqësues i mazhorancës, ai do të bashkëpunojë me opozitën. Unë jam optimist racional. Pra, neve na nevojitet të ndjekim traditën që Kodi Zgjedhor është miratuar me konsensus”, tha ministri Majko.
