Një sipërfaqe prej mijëra metrash katrorë në zonën e Radhimës në Vlorë është vënë në sekuestro preventive. Vendimi është dhënë nga gjykata e rrethit, ndërkohë që hetimet për të zotin e kësaj toke (pronë) kanë nisur javë më parë. Sipas të dhënave të policisë së Vlorës, bëhet me dije se ka dyshime të forta që personi që e zotëron këtë sipërfaqe, prej më shumë se 23 mijë metër katrorë, ta ketë përfituar me anë të falsifikimit të dokumenteve.
Hetimet e shtrira në kohë kanë konkluduar në një kërkesë në gjykatë për të ndërhyrë dhe bllokuar këtë pronë deri në përfundimin e të gjitha hetimeve. Policia lokale ka dalë me një reagim zyrtar në lidhje me këtë sekuestro, ndërkohë që pretendohet që pronari i saj të ketë konsumuar me këtë rast dy vepra penale, atë të falsifikimit dhe të pastrimit të parave.
Reagimi zyrtar
Vijon puna për gjurmimin, evidentimin dhe sekuestrimin e pasurive të përfituara nga veprimtaria kriminale nga ana e policisë dhe e prokurorisë. Është vendosur sekuestro preventive për një sipërfaqe toke të mbjellë me pemë, që kap vlerën 2.3 milionë euro. Seksioni për Hetimin e Krimit Ekonomik e Financiar pranë Drejtorisë Vendore të Policisë Vlorë, nën drejtimin e Prokurorisë së Vlorës, ka bërë ekzekutimin e një tjetër vendimi të Gjykatës së Rrethit Gjyqësor Vlorë, për vendosjen e masës së sigurisë pasurore “Sekuestro preventive”.
Kjo sekuestro është bërë mbi sipërfaqen 23.000 m2, e mbjellë me pemë në zonën e Radhimës, vlera financiare e së cilës kap shifrën rreth 2.3 milionë euro. Ky sekuestrim pasuror u bë në kuadër të hetimit ndaj shtetasit A. L., si person i dyshuar për kryerjen e veprave penale “Pastrimi i produkteve të veprës penale ose veprimtarisë kriminale”, si dhe “Falsifikimi i dokumenteve”.
Nga hetimet e kryera në bashkëpunim të ngushtë me Prokurorinë, ka rezultuar se, ky shtetas dyshohet ta ketë përfituar këtë sipërfaqe pemëtore me anë të falsifikimit të dokumenteve. Veprimet e mëtejshme mësohet se do të ndiqen nga ana e Prokurorisë, ndonëse nuk bëhet me dije se kush janë personat e tjerë nën hetim, për këtë falsifikim dokumentesh.
Dyshimi
Referuar të dhënave të policisë së Vlorës bëhet me dije se, personi L.B., është i dyshuar që prej vitit 2014 edhe si i përfshirë në një rrjet trafikimi narkotikësh. Madje dyshimet për pasurinë e tij kanë nisur që kur Italia e skedoi emrin e tij, por pak kohë më parë ishte vetë policia e Shtetit që bëri me dije se, bëhet fjalë për një sekuestro të një pasurie që kapte shifrën e 500.000 Eurove, duke patur parasysh edhe dy apartamente të tijat, njërin në Vlorë dhe tjetrin në Orikum.
Gjithashtu u fol se, veç të tjerave ishte kërkuar edhe sekuestrimi i një automjeti që dyshohej se vinte nga kjo veprimtari e paligjshme. Në reagimin e fundit të policisë në fakt, nuk flite për akuzat italiane, por është rritur shumë shifra e sekuestros./Nikoleta Kovaçi/Fjala.al/
