Punonjësit e mediave, gazetarët, reporterët, aktivistët dhe analistë, mbështetur edhe nga opozita, kanë nisur prej pak kohësh një protestë kundër paketës “anti-shpifje” të qeverisë. E njoftuar për në orën 09:30, protesta grumbulloi para Parlamen dhjetëra aktivistë të shoqërisë civile dhe gazetarë. Vendi ishte caktuar pikërisht aty pasi në këtë orë brenda sallës së Parlamentit deputetët kanë nisur prej orës 10:00 seancën plenare, ku në rend dite është edhe votimi i kësaj pakete.
Protesutesit janë shfaqur me pankarta në duar, ku japin mesazhe të ndryshme për lirinë e fjalës. Shoqatat e gazetarëve dhe shoqërisë civile kundërshtojnë këtë paketë me pretendimin se ajo nuk i jep zgjidhje lajmeve të rreme dhe shpifjeve, siç pretendon qeveria, por është përpjekje për të kapur median online.
E propozuar nga qeveria me në krye kryeministrin Edi Rama në paketën anti-shpifje parashikohet që Autoriteti i Mediave Audiovizive të marrë kompetenca deri në mbylljen e portaleve, nëse gjykon se ka publikuar lajme të rreme apo shpifje.
Ndërkohë, kundërshtarët e paketës theksojnë se ky vendim mund të merret vetëm nga Gjykata dhe se asnjë institucion tjetër nuk mund të marrë kompetencat që i takojnë drejtësisë. Nga ana tjetër, paketa anti-shpifje është kritikuar edhe nga ndërkombëtarët, të cilët po ashtu, e kanë vlerësuar si pengim të fjalës së lirë./Fjala.al/
