Shefat e misioneve të Bashkimit Evropian të vendosura në Kosovë, në një deklaratë të përbashkët i kanë bërë thirrje klasës politike që të formojë sa më shpejt qeverinë e re.
“Seanca konstitutive e Kuvendit është caktuar të mbahet më 26 dhjetor. Zgjedhjet e përgjithshme të 6 tetorit i dhanë mundësinë popullit të Kosovës të ushtrojnë të drejtën e tyre demokratike për të votuar dhe zgjedhur udhëheqësit e tyre. Ky është thelbi i procesit demokratik. Ne besojmë se palët në fjalë do të arrijnë konsensusin e nevojshëm për të kapërcyer sfidat e mbetura. Kosova duhet të rifillojë punën urgjent për vijimin e reformave të zhvillimit ekonomik dhe shoqëror, reformat për zbatimin e ligjit, zbatimin e Marrëveshjes së Stabilizim-Asociimit BE-Kosovë dhe për Dialogun me Serbinë. Nevojitet që të formohet sa më shpejt një qeveri e cila do të çojë përpara këto procese.”- thuhet në deklaratë.
Dy partitë e renditura të parat në zgjedhjet e parakohshme të tetorit, Lëvizja Vetëvendosje dhe Lidhja Demokratike e Kosovës janë në bisedime për formimin e koalicionit qeverisës. Kreu i Vetëvendosje, Kurti në një intervistë të dhënë pak ditë më parë për Deutsche Welle, tha se me LDK-në janë dakorduar për disa aspekte të programit qeverisës, si numri i ministrive, ndarja e tyre mes partive të koalicionit dhe partive të pakicave./fjala.al
