Zgjedhja e kreut të SPAK, Arben Kraja ka kaluar edhe në lupën e Institutit për Studimet dhe Pasojat e Krimeve të Komunizmit.
Sipas ish-drejtuesit të këtij instituti, Agron Tufa, kreu i SPAK Arben Kraja ka qenë hetues në kohën e komunizmit. Kraja u zgjodh gjatë ditës së sotme me 6 vota nga anëtarët e KLP-së.
“Ish-Sigurimi komunist i Diktaturës rilindi plotësisht me pushtetin e Edi Ramës dhe Rilindjen. Konfirmimin absolut e shohim me zgjedhjen në krye të SPAK-ut të një ish hetuesi të komunizmit, Arben Kraja. Imagjinoni se me çfarë drejtësie e për çfarë “krimesh e kriminelësh të komunizmit”, do mund të shqyrtonim ne me hetuesit dhe oficerët operativë grusht bashkuar rreth partisë-nënë!
Ka vend një pyetje këtu: – Kush ia dha pastërtinë e figurës këtij ish-hetuesi? Mos valle ish-oficerët operative qe drejtojnë zyrat e vetingut? Po per keto gjera u konfrontova une! Për çka tjetër!?
Për këtë duhet te shprehen AIDSSH dhe DSIK, të lajnë veten
Ndryshe mbetet ne fuqi ai proverbi dibran: “Ja ma gjé, ja ma ke!”
Gjithsesi, qysh kur nisi kjo lojë e ndyre pa pike morali, unë jam shprehur ne kohë,”-ka shkruar Tufa në Facebook.
Agron Tufa ndodhet aktualisht në Zvicër ku ka kërkuar azil politik së bashku me familjen e tij. Ai ka denoncuar shpesh se ish-hetues të diktaturës kanë pozicione të larta shtetërore.
