Kryetarja e Lëvizjes Socialiste për integrim, Monika Kryemadhi ka reaguar për ngritjen e Strukturës së Posaçme Anti-Korrupsion. Në një postim në Facebook, Kryemadhi ka përshëndetur krijimin e SPKA-ut dhe e ka cilësuar si një moment shprese për sistemin e drejtësisë në vend.
“Përshëndes krijimin e SPAK si një zhvillim i rëndësishëm i pritur prej kohësh i Reformës në Drejtësi.
Fillimi i aktivitetit të SPAK është moment shpresëdhënës se në Shqipëri do të nisë seriozisht puna për ndëshkimin e pandëshkueshmërisë dhe për sundimin e ligjit. Ne besojmë që një nga institucionet më të rëndësishme të drejtësisë do të veprojë i pandikuar nga presioni i çfarëdolloj dhe i pandikuar nga politika.
Ngritja e Strukturës së Posaçme dhe Byrosë së Hetimit do sjellë një erë të re në garantimin e sigurisë juridike për qytetarët e thjeshtë dhe për barazinë përpara ligjit. Koha e “të fortëve”, kriminelëve me pushtet apo të mbrojtur nga pushteti, ka mbaruar.
Me këtë rast përshëndes dhe angazhimin e partnerëve tanë ndërkombëtarë, SHBA dhe BE, për mbështetjen e vazhdueshme për krijimin e kësaj strukture kaq të rëndësishme për drejtësinë në Shqipëri dhe për integrimin e saj në Bashkimin Evropian”,- thuhet në deklaratën e Kryemadhit.
Krijimin e SPAK-ut e ka përshëndetur dhe nënkryetari i LSI, Luan Rama. Për nënkryetarin e LSI mbështetja e SHBA-ve për SPAK-un është një garanci që institucioni do të jetë i pavarur dhe do të kryejë misionin e tij.
“Inkurajim, besim dhe mbështetje për SPAK-un
Me betimin e trupës së prokurorëve të SPAK-ut para Presidentit të Republikë, nis nga puna një prej institucioneve më të rëndësishëm të Reformës në Drejtësi.
Inkurajim, besim dhe mbështetje të plotë për SPAK-un, në zbatim të ligjit me integritet moral dhe profesional.
Suksese SPAK-ut në përmbushjen të misionit dhe pritshmërive në zbatim të ligjit.
Mbështetja e SHBA për SPAK-un, garanci e madhe që shqiptarët të presin me besim jetësimin e një institucioni të pandikuar politikisht dhe kredibël në zbatimin e ligjit, në luftën e vendosur dhe me tolerancë zero ndaj korrupsionit dhe krimit të organizuar”,- shkruan në profilin e tij në Facebook nënkryetari i LSI, Luan Rama./Fjala.al/
