Ditën e djelë do të luhen ndeshjet e javës së 17-të të Kategorisë Superiore, ku një nga më delikatet është ajo midis Partizanit dhe Vllaznisë.
Katër takimet e para, Bylis-Luftëtar, Flamurtar-Teuta, Laçi-Tirana dhe Kukës-Skënderbeu do të mbahen në orën 13:00, ndërsa sfida midis “Demave të kuq” dhe shkodranëve do të zhvillohet në orën 16:00.
Ndërkohë, momentalisht faqja zyrtare e klubit të Partizanit në “Facebook” ka bërë publike çmimet e biletave për takimin që do luhet në stadiumin “Selam Stërmasi”, të cilat do të jenë në shitje duke filluar nga dita e nesërme. Bileta me çmimin më të lirë do të jetë 300 lekë, ndërsa me e shtrenjta 1000 lekë të reja.
Kjo ndeshje është shumë e rëndësishme për kryeqytetasit, të cilët nga vendi i parë ranë në atë të pestin me vetëm dy takime, ku humbën derbin me Tiranë me rezultatin 2-1 dhe takimin me Teutën 1-0.
Rikujtomë që pas humbjes së derbit u shkarkua trajneri italian Franko Lerda dhe se momentalisht drejtuesit e klubit janë duke shikuar mundësitë e zëvendësimit të tij./Përgatiti: Fjala.al/
