Presidenti turk Erdogan shprehet se situata e fluksit të emigrantëve po bëhet e papërballueshme për Turqinë.
Vendi i tij po strehon rreth 3,7 milionë refugjatë të tjerë, ndaj i ka kërkuar ndihmë komunitetit ndërkombëtar.
Turqia nuk mund ta përballojë një valë të re refugjatësh nga Siria, ndaj ka kërkuar ndihmën e vendeve evropiane.
Presidenti turk Rexhep Taip Erdogan tha të dielën se rreth 80 mijë emigrantë po tentojnë të mbërrijnë në Turqi për t’i shpëtuar bombardimeve ruse dhe siriane në provincën veriperëndimore e Idlibit.
“Nëse nuk ndalet dhuna ndaj banorëve të Idlibit, ky numër do të rritet edhe më shumë. Në atë rast, Turqia nuk ka për ta mbajtur e vetme këtë peshë. Pasojat negative të presionit ndaj nesh do i ndjejnë të gjitha shtetet evropiane, sidomos Greqia”, deklaroi Erdogan.
Ankaraja aktualisht strehon rreth 3,7 milionë sirianë apo numrin më të madh të refugjatëve në botë.
3 milionë të tjerë jetojnë ende në provincën e Idlibit, rajoni i fundit sirian që kontrollohet nga luftëtarët rebelë dhe xhihadistët e rreshtuar kundër presidentit Bashar al-Asad.
