Sulmuesi i PSG-së, i cili kaloi nga Barcelona te francezët me një shumë prej 222 milionë eurove, Neymar Da Silva Santos Jr, ka kaluar një fëmijëri shumë të vuajtur dhe në varfëri të thellë, ku mungonin edhe bazat ushqimore.
Gjatë një interviste për kanalin “O primo Rico” në “Youtube”, lojtari i PSG-së ka kujtuar një pjesë të trishtë të fëmijërisë së tij.
“Ka një histori me nënën time dhe mendoj se shumica e njerëzve e dinë. Unë doja të haja biskota, por nuk kishim asnjë lek dhe mami më tha: ‘Bir, nuk kemi më para, nuk bëhet. Ta kam borxh këtë javë, ndoshta javën tjetër kur babi të marrë rrogën. Nuk mund t’i blejmë tani’.
Unë iu përgjigja: ‘Mami, nuk ka problem. Një ditë unë do të jem shumë i pasur. Do të blej një fabrikë biskotash që të ha sa herë të dua’. Nëna ime qan kur ajo e tregon sot këtë histori, sepse është me të vërtetë prekëse për të”.- tha sulmuesi.
Që nga ai moment nuk kaloi shumë kohë që Neymar të spikatej dhe të cilësohej si një lojtar me të ardhmen.
“Isha 14-15 vjeç kur kuptova se nuk do më mungonte më asgjë nëse do t’i bëja gjërat në mënyrën e duhur dhe nëse do lija prindërit që të kujdeseshin për gjithçka”-shtoi Neymar.
Që nga ajo moshë jeta e 26-vjeçarit ndryshoi totalisht dhe tashmë ai është një nga lojtarët më të paguar në historinë e futbollit./Përgatiti: Fjala.al/
