Humbja 3-1 ndaj lacialëve e ka vënë në alarm Juventusin. Edhe pse me repartin e sulmit ndër më të mirët në Europë, prapë nuk mjaftuan të thyejnë romanët e Lazios në finalen e Supërkupës.
Në fakt kjo humbje ishte dy herë shpullë për kampionët italianë të cilët u mundën edhe në takimin e radhës.
Por drejtuesit e Juves, duke parë dëshpërimin e madh që kaloi skuadra kanë menduar të futen në merkaton e Janarit fuqishëm. Emri që lakmon gjithë Europa është ai i yllit norvegjez të Salsburg, Erling Braut Haaland.
Kështu humbja dhe një sezon me ulje ngritje ka trazuar jo pak ambientin në shtëpinë e “Zonjës së Vjetër”. Dy teknikët e njohur Nedved dhe Paratici po planifikojnë të futen menjëherë në merkato për t`i bërë dhuratën e parë trajnerit Sarri.
“Tuttosport” dhe “Corriere dello Sport” bashkohen në një pikë këtë të martë teksa kanë hapur faqen e parë të gazetës me Erling Braut Haaland.
Talenti anglo-norvegjez pritet të jetë dhurata e parë për Sarrin, një lojtar i cili këtë sezon ka shënuar 22 gola në 28 ndeshje. Juve ka kaluar konkurrencën e M. United, B. Dortmund dhe Laipzig, tri ekipe që gjithashtu janë në garë për biondin e Salzburg.
Mino Raiola së bashku me “xhevahirin” e tij kanë nisur një tur këtë periudhe për të dëgjuar ofertat e Dortmund dhe Laipzig, por në fund ka qenë vetë lojtari, sigurisht i shtyrë dhe nga Raiola, që ka vendosur të vijoj karrierën në Torino.
Gjithnjë sipas dy medieve italiane, gjithçka pritet të mbyllet mbi bazën e 30 milion euro plus bonuseve. Me Haaland, Juventus mendohet se do të kompletojë ofensivën e cila edhe në këto kushte është e fortë me CR7, Dybala dhe Higuain edhe pse nuk mundën dot ta thyenin Lazion modeste pa yje, por me një skuadër të bashkuar. /Fjala.al/
