Britania do të “jetë gjithmonë e mirëpritur në BE pas Brexit-it”, kështu është shprehur nënkryetari ekzekutiv i Komisionit Evropian.
Në një “letër dashurie” drejtuar Mbretërisë së Bashkuar, Frans Timmermans pranon se “shumë dëme të panevojshme” u janë shkaktuar të dyja palëve gjatë negociatave të hidhura të largimit të Britanisë dhe ai druhet se dëme të tjera do vijojnë të ndodhin.
Kjo deklaratë vjen kur Boris Johnson po përgatitet të ndërpresë ligjërisht lidhjet me bllokun evropian më 31 janar pasi fitoi shumicën e votave Konservatore në zgjedhjet e përgjithshme që u mbajtën.
Pak para se deputetët të largoheshin nga Dhoma e Komunave për pushimet e Krishtëlindjeve, marrëveshja “Brexit” hapi rrugën që legjislacioni të pastrojë parlamentin nga mesi i janarit.
Pritet që negociatat për marrëdhëniet e ardhshme midis BE-së dhe Mbretërisë së Bashkuar të fillojnë me seriozitet muajin tjetër pasi të dy palët do të diskutojnë marrëveshjen e tregtisë së lirë para afatit të rreptë të z.Johnson, në dhjetor 2020.
Timmermans e niste shkrimin e tij duke theksuar se kohët e fundit kishte lexuar një libër të lezetshëm letrash dashurie për Europën. Dhe kjo më bëri të mendoj dashurinë time për Britaninë”, është shprehur zyrtari holandez.
Duke iu drejtuar Brexitit, Z. Timmermans tha për “The Guardian” se vendimi i Britanisë për t’u larguar i copëton zemrën, por ai shtoi: “Unë e respektoj këtë vendim. Asnjëherë nuk kemi qënë në një mendje për këtë çështje, ashtu sikurse nuk kemi qënë as për BE-në”.
Ai vazhdoi: “E vërteta është se u ndjeva shumë i lënduar kur vendosët të largoheshit. Tre vjet më vonë unë jam i trishtuar që një anëtar i familjes sonë dëshiron të ndërpresë lidhjet me ne. Por në të njëjtën kohë gjej rehati në mendimin se lidhjet familjare kurrë nuk mund të prishen me të vërtetë.”
