Maqedonia është duke shkuar drejt formimit të qeverisë së re. Sot është paralajmëruar një takim mes kryeministrit Zoran Zaev dhe liderit të VMRO-DPMNE-së, Hristian Mickoski.
Zaev pati theksuar gjatë ditëve të kaluara se nuk do të ketë zgjedhje më 12 prill. Ndërsa kërcënoi duke thënë se nuk do të japë dorëheqjen, nëse opozita nuk i zhbllokon ligjet nga të cilat varen rrogat, pensionet dhe investimet.
Kryetari i Kuvendit, Talat Xhaferi dje doli me deklaratë se shumica në pushtet dhe VMRO-DPMNE-ja opozitare arritën marrëveshje për t’u miratuar të gjitha propozimet ligjore nga mbledhja e 123-të, të cilat janë të lidhura me zbatim prej 1 janarit.
Deputetët opozitarë deri pardje pasdite me fjalime të gjata dhe replika pothuajse e bllokuan këtë seancë.
Mbledhja e 123-të vazhdon sot, ndërsa në të duhet të sillen rreth 40 ligje të lidhura me afat, përkatësisht me zbatim prej 1 janarit, mes të cilave edhe nga sfera e financave, sociales dhe shëndetësisë. Pikat e tjera nga kjo mbledhje në rend dite do të shqyrtohen pas Vitit të Ri.
