Liria e shprehjes fiton dhe, pas më shumë se dy vjet e gjysmë censurimi, Wikipedia përsëri do të jetë e aksesueshme në Turqi. Vendimi u njoftua nga autoriteti i kontrollit të teknologjisë së informacionit dhe komunikimit (Btk), sipas raportimit të CNN turke, pasi Gjykata Kushtetuese e Ankarasë kishte vendosur me shumicë se bllokimi i web-eve cënonte ‘lirinë e shprehjes’.
Bllokada do të hiqet pasi arsyet e vendimit të jenë publikuar nga Gjykata Kushtetuese, tha organi i kontrollit të internetit në Turqi. Të enjten, më 26 dhjetor, Gjykata Kushtetuese turke vendosi se bllokimi i hyrjes në website shkelte të drejtën e lirisë së shprehjes “e garantuar me nenin 26 të Kushtetutës”. Vendimi i Gjykatës, i publikuar në faqen e tij të internetit, u mor me shumicë, me 10 vota kundër 6, siç raportohet nga agjensia Anadolu.
Themeluesi i Wikipedia-s, Jimmy Wales, mirëpriti vendimin duke shkruar “Mirë se u ktheve, Turqi”, në një postim në Twitter, shoqëruar me një foto gjatë një udhëtimi në Turqi.
Vendimi erdhi pas një apeli nga fondacioni Wikipedia në maj 2017 duke kërkuar anulimin e ndalimit të qeverisë. Çështja përfundoi edhe para Gjykatës Evropiane të të Drejtave të Njeriut.
