Të paktën 28 persona janë vrarë gjatë sulmit në një akademi ushtarake në kryeqytetin libian, Tripoli. Lajmin e bëri të ditur ministri i shëndetësisë i këtij shteti.
Të dhënat janë publikuar nga “The Guardian”. Tripoli, i cili është nën kontrollin e Qeverisë së Akordit Kombëtar, të njohur nga komuniteti ndërkombëtar, është duke u përballur me ofensivën e Ushtrisë Kombëtare Libiane.
Kjo ushtri drejtohet nga gjenerali Khalifa Haftar, ofensiva e së cilës filloi në prill të vitit të kaluar.
Javëve të fundit, sulmet ajrore dhe bombardimet në Tripoli janë shtuar. Ky shtim ka rritur njëkohësisht frikën për daljen e situatës nga kontrolli për shkak të vendimit të Turqisë për të dërguar trupa në përkrahje të qeverisë së njohur nga ndërkombëtarët.
Forcat aleate të kësaj qeverie e përshkruan sulmin e së shtunës në akademinë ushtarake si bombardim ajror, i realizuar nga rivalët e tyre në lindje të vendit.
Megjithatë, një zëdhënës i Ushtrisë Kombëtare Libiane mohoi se këto forca ishin të përfshira në sulmin e mbrëmshëm.
Hamid bin Omar, ministër i shëndetësisë, tha se numri i personave të vdekur dhe të personave të plagosur është duke u rritur.
Autoritetet shëndetësore bënë thirrje për armëpushim deri në nxjerrjen e trupave të pesë civilëve të vrarë dhe evakuimin e familjeve që jetonin në atë zonë.
Ekipet e emergjencës u detyruan të tërhiqen nga vendi i ngjarjes për shkak se ato u përballën me të shtëna.
Raketat dhe bombardimet ndikuan që edhe aeroporti i qytetit të mbyllej të premten, shkruan “The Guardian”!
Përgatiti /Fjala.al/
