Një automjet i djegur është gjetur në Golaj të Hasit dhe dyshohet se është e autorëve të vrasjes së Guxim Gjyriqit në mesnatë në Tropojë. Autorët që pritën Guxim Gjyriqin të dilte nga biznesi i tij, e qëlluan me armë dhe më pas u larguan për të djegur edhe mjetin. Policia ndërkohë po bën krehjen e gjithë zonës për të zbuluar, identifikuar dhe kapur autorët por ndërkohë nga automjeti mund të gjendet ndonjë provë.
Nga të dhënat e para bëhet me dije se mjeti nuk rezulton i njohur. Policia nuk ka gjetur asnjë shenjë në të. Sipas të dhënave ekspertët po bëjnë këqyrjen për të mundësuar ndonjë detaj për të nxjerrë emrin e personit që rezulton pronari. Ende nuk dihet nëse mjeti është grabitur gjëkundi. Policia, vazhdon të jetë shumë larg kësaj ngjarjeje kur kemi parasysh që informacionet e para për të u dhanë 8 orë pas ekzekutimit.
Burimet nga policia e Kukësit bëjnë të ditur se janë rrethuar një sëri zonash në Tropojë e Has, ndërkohë po kryhen krehje në disa fshatra kufitare.
Hetimet janë përqendruar në një sërë pistash. Policia është tejet e kujdesshme për të mos lejuar asnjë informacion të bëhet publik. Sidomos në lidhje me pistat dhe shkaqet e këtij atentati që ka tronditur qytetin më verior të vendit.
Akti i vrasjes së Guxim Gjyriqit mbrëmjen e djeshme ka kthyer edhe njëherë panikun në Tropojë. Frika e rikthimit të vrasjeve të dikurshme është një prej problemeve që në fakt fut në panik edhe gjithë shoqërinë shqiptare. Tropoja dhe 5 vitet e “luftës” së saj janë një gjërat më të errëta që do mbahen mend në vendin tonë. /Fjala.al/
