Presidenti i skuadrës së Bylisit, Besnik Kapllanaj, e ka kritikuar ashpër kalimin e ish lojtarit të Tiranës, Dorian Kërçikut te Partizani.
Kapllanaj e ka quajtur Kërçikun frikacak dhe ka thënë se iku si hajdut nga Ballshi, pasi deri ditën e djeshme ishte folur për arritjen e dakordsisë midis Bylisit dhe Lojtarit.
Presidenti i klubit të Ballshit ka thënë se Kërçiku i ka shkruar një mesazh dhe i ka kërkuar falje, pasi sipas tij nuk ka pasur guxim t’i dalë përpara.
“Mbrëmë vonë më dërgoi një mesazh dhe më pas fiku telefonin. Kishim rënë dakord për gjithçka dhe kontrata ishte thjesht një formalitet. Mirëpo, ajo që na bëri ishte një pabesi. Iku si hajdut dhe kur mësova që shkoi te Partizani, telefonova menjëherë presidentin Demi.
Kemi miqësi me të dhe as ai nuk ishte në dijeni, por pasi foli me drejtuesit e tjerë të klubit, u konfirmua. Megjithatë, më mirë që ndodhi kështu. Ai ka për t’ia bërë edhe Partizanit këtë. Një klub i madh si Partizani nuk i ka hije të mbaj një skuth”, -është shprehur Kapllanaj./Fjala.al/
