Presidenti i Federatës Shqiptare të Futbollit, Armand Duka, ka pranuar se vendosja e Christian Panuccit në krye të Kombëtares ishte një gabim i madh.
Në një intervistë për medien italiane “Ttuttosport”, Duka u ka kërkuar falje tifozëve dhe ka thënë se zgjedhja e Panuccit ka qenë një gabim tërësor.
“Në zgjedhjen e Panuccit kam gabuar tërësisht dhe u kërkoj falje tifozëve. Për ne Kombëtarja është gjëja më e rëndësishme dhe ai e shkatërroi skuadrën”.-u shpreh Presidenti i FSHF-së.
Më tej ai ka shtuar se italiani është një person konfliktues e se kurrë nuk do mund të jetë trajner, pasi sipas Dukës ai mendon vetëm për para e jo për futboll.
“Ai është një njeri me konflikt: Ai kurrë nuk do të jetë trajner. Pas çdo ndeshjeje pati tensione me shtypin, ajo krijoi çarje në ekip. (Panucci) nuk mendon për futbollin, por vetëm për paratë. Kur e njoftova për shkarkimin, menjëherë më tha që do të pretendonte edhe qindarkën e fundit. Nuk është çështje ekonomike, por korrektësi etike”-ka thënë ndër të tjera ai.
Ndërsa, për trajnerin aktual, Edy Reja-n, kreu i FSHF-së ka thënë se është bindur nga Tare për të ardhur në krye të Kombëtares sonë.
“Reja ishte pak i dyshimtë në fillim, kështu që Tare e thirri dhe e bindi që të bëhej trajneri i Shqipërisë. Kemi një projekt të mirë dhe objektivi është që të marrim pjesë në Evropianin e vitit 2024”-u shpreh për medien italiane Armand Duka./Fjala.al/
