Vendimi i Bashkisë së Tiranës për spostuar terminalin e autobusëve te kthesa e Kamzës ka shkaktuar kaos në qarkullimin e mjeteve në aksin nga kthesa e Kamzës në Institut dhe nga Ura i Institutit deri te hyja për në autostradën Tiranë-Durrës. Ose afër rreth rrotullimit të“Casa Italia”. Autobusët dhe furgonët që duhet të udhëtojnë për në jug të vendit nga Kthesa e Kamzës ku kanë vendqëndrimin duhet të shkojnë deri tek Ura Institutit të marre kthesën të rikthehen edhe një herë në vendnisje dhe më pas të hyjnë në autostradë. Kaosi në qarkullim është ndjerë që në ditët e parë të hyrjes në fuqi të vendimit, që solli edhe zhvendosjen e terminalit të autobusëve. Të gjitha ata që do të duan të udhëtojnë drejt jugut të vendit, prej datës 3 janar 2020 do të kenë një tjetër pikënisje të udhëtimit të tyre, nga “Shqiponja” tek Kthesa e Kamzës.
Bashkia e Tiranës e mori vendimin pasi në janar pritet të rinisin punimet për nënkalimin e rrethrrotullimit të sheshit “Shqiponja”. Deri më tani terminali pranë rrethrrotullimit të Shqiponjës shërbente si terminali i transportit ndërqytetas të zonës së jugut, por në janar 2020 do të spostohet. Shkakun e zhvendosjes së këtij terminali pranë zonës së njohur si Kthesa e Kamzës e shpjegoi kryebashkiaku i Tiranës, Erion Veliaj para pak ditësh. “Pas festave të gjithë autobusët ndërqytetas që qëndrojnë te terminali te ish – dogana do të kalojnë rrugën në anën tjetër dhe terminali do të zhvendoset te kthesa e Kamzës”, tha Veliaj.
Pas pezullimit të punimeve për Unazën e Madhe të kryeqytetit, në janar pritet që këto punime të rinisin për nënkalimin pranë sheshit “Shqiponja” dhe terminali aktual i jugut të shërbejë si kantier ndërtimi.
