Arrestimi në Kosovë i Ikballe Hudutit nuk ka kaluar pa zhurmë edhe në arenën ndërkombëtare. Gruaja e cila u pozicionua publikisht kundër sulmit të Shteteve të Bashkuara të Amerikës në Iran i mohoi mesazhet e saj. Ajo fajësoi mediet që ia nxorën jashtë konteksti, por janë disa deklarata të së bijës e cila duket se veç përfshirjes së vetes në ‘probleme’ tregon se edhe mesazhet e nënës së vet ishin kërcënues dhe nxitëse, siç i quan edhe prokuroria.
Zehra Huduti, e bija e të arrestuarës Ikballe Berisha-Huduti, në një intervistë për televizionin “Nasr Tv”, kishte folur për luftën ndaj Amerikës dhe Izraelit. Zehra, e cila ndodhej për studime në Iran, kishte thënë se vendi i saj Kosova nuk është vend islamik dhe me gjithë eksperiencën që kishte marrë në Iran do ta përdorte në shtetin amë.
“Unë jam Zehra Huduti nga Kosova, vendi më i ri në Evropë, para 12 vitesh i njohur si ish-Jugosllavia. Pas luftës ne u pavarësuam dhe janë bërë 11 vite që ne jemi të pavarur dhe një vend i ri. Unë studioj në Iran. Tash jam në këtë konferencë, për ri-zgjimin islam. Kjo është shumë e rëndësishme për vendin tim që nuk është një vend islamik. Unë kam nevojë për diçka të tillë, si kjo konferencë, që të mund të bëjë diçka në vendin tim, pas kësaj konference”- kishte thënë ajo.
Zehra, duke qeshur ishte shprehur se gjithë myslimanët janë të bashkuar dhe do ta luftojnë Izraelin dhe Amerikën. Myslimanët janë të bashkuar. Por, me këtë konferencë, ne mund ta luftojmë Izraelin dhe Amerikën”, kishte deklaruar ajo mes tjerash. Ndërkaq, nënës së Zehras, Ikballe Berisha-Hudutit, i është caktuar 1 muaj paraburgim, pasi përmes shkrimeve në Facebook, doli kundër vrasjes së gjeneralit iranian Qasem Soleimanit.
Ishin mediet ndërkombëtare në fakt që i morën deklaratat e shqiptares së Kosovës dhe treguan se bëhet fjalë për një nxitëse të sulmeve terroriste. “Telegraf” dhe “Reuters” i kushtuan vëmendje të posaçme Hudutit, ndërsa ajo mundi t`i fshinte postimet e saj dhe më pas do të deklaronte para hetuesve se fjalët e saj ishin nxjerrë jashtë konteksti nga media.
Por prania e të bijës në një konferencë të tillë duket se nuk e përjashton dot nga akuza gruan e vënë në pranga. /Fjala.al/
