Është ndarë nga jeta një ditë më parë, intelektuali i mirënjohur shkodran, David Luka. Lajmin e ka bërë të ditur Radio Vatikani, ku Luka ka qenë bashkëpunëtor i saj prej shumë vitesh.
David Luka, një personalitet i arsimit shqiptar për shumë vite si mësues i gjuhës shqipe në Shkodër rreth viteve 80 pasi për shumë vite ka punuar si i dëbuar nga regjimi si punëtorë në Mamurras.
Kryeredaktori i parë i gazetës “Shkodra”, gazeta e parë opozitare në vitin 1991 pas gazetës “RD”. Drejtor i Radio Shkodrës për disa vite, pas vitit 1992, më pas pedagog i gjuhës shqipe me titull ‘Profesor Doktor’ në Universitetin Luigj Gurakuqi të Shkodrës.
Prof. Luka ka një kontribut të vyer në shkencën e gjuhësisë dhe autor i një sërë veprash në këtë fushë. Partia Demokratike, dega Shkodër, i ka shprehur ngushëllimet më të sinqerta familjarëve të Prof. Lukës.
Ngushëllime kanë ardhur edhe nga redaksia në gjuhën shqipe e Radio Vatikanit dhe e gjithë familja shumëkombëshe e Radio Vatikanit – Vatican News: “Të gjithë anëtarët e redaksisë shqipe dhe të familjes së madhe të Radio Vatikanit – Vatikan News, bashkohen në lutje drejtuar Zotit me kolegen Ana Luka dhe familjen e saj, për ndarjen nga kjo jetë të vëllai të dashur Prof. Dr. David Luka.
Duke kërkuar nga Krishti i Gjallë ngushëllimin e krishterë, Anës dhe familjarëve në zi, u sigurojmë afërsinë tonë shpirtërore e vëllazërore, e të bashkuar në lutje i kërkojmë Zotit të jetës ta pranojë vëllanë e dashur, Davidin, në gëzimin dhe paqen e bashkimit të amshuar me Të”.
Prof. Dr. David Luka, gjuhëtar e pedagog i Universitetit të Shkodrës, qe një burrë, vëlla, babë i mirë e bujar. Qe dashurues e studiues i shquar i gjuhës shqipe. Të shumta shkrimet e vepra kushtuar gjuhësisë.
Prof. Dr. David Luka i lindur me 15. 05. 1935, kreu shkollën pedagogjike në Shkodër e ma pas Universitetin e Tiranës, dega gjuhë-letërsi. Shërbeu si mësues nga Tepelena, në Kukës e së fundi në Shkodër si drejtor i Radio Shkodrës e mandej si pedagog pranë Institutit Pedagogjik të Shkodrës, me titullin Doktor Profesor.
La pas ma se 17 vepra e qindra shkrime, kryesisht në fushën e gramatikës historike. /Fjala.al/
