Nga /Fjala.al/
Mbrëmë policia e Shtetit njoftoi arrestimin e një personi nga Fushë-Kruja i cili po udhëtonte në drejtim të Tiranës me një mjet të blinduar, me fenelina policie dhe me armë.
Edmond Voga është personi që u bë i njohur nga një konflikt familjar nga i cili në fakt dolën në dritë një sërë të dhënash komprometuese edhe të vetë prokurorit të cilit aso kohe i shërbente si shofer dhe shoqërues.
Prokurori Arjan Ndoja, i cili i shpëtoi mrekullisht një atentati në Shkozet pak kohë më parë, atentat në të cilin humbi shoferin tjetër, u bë objekt i një mori padish nga një konflikt pasuror mes tij dhe familjes së të arrestuarit të mbrëmshëm.
Policia e Tiranës që mbrëmë ndodhej në zonën e Vorës për të kryer urdhër-arrestet e prokurorisë, gjatë kontrolleve në rrugën Vorë-Krujë, e pikasi mjetin luksoz në të cilin gjendej miku i prokurorit.
Edmond Voga rezultoi se drejtonte një automjet të blinduar pa autorizimin përkatës, madje me fenelina policie dhe me mangësi në dokumentacionin e mjetit. Makinës iu bë kontroll i imtësishëm, gjatë të cilit, 44-vjeçarit nga Fushë Kruja iu zbulua në çantën e dorës një armë zjarri pa leje, e tipit TT.
Në 21 korrik të vitit 2018, Mondi Voga u padit nga avokati Ilia Ilia si një ndër personat që e sulmuan para gjykatës së Durrësit. Avokati deklaronte asokohe se i njohu dhe i identifikoi autorët si njerëz të vënë nga prokurori Arjan Ndoja. Njëri ndër agresorët sipas tij ishte edhe shoferi i këtij të fundit, Mondi Voga. Babai i shoferit të Ndojës, Kadri Voga u shpreh se djali i tij është përdorur nga prokurori Ndoja.
Prokurori Ndoja u kallëzua nga avokati, ndërsa çështja është ende në hetim. Voga njihet si tip problematik. Deri në shtator të vitit të kaluar ka qenë inspektor mjedisi në Durrës, ndërsa para dy vitesh drejtori i ALUIZNI-t në Fushë-Krujë. Para pak vitesh vëllait dhe të atit të tij i dogjën makinën në oborrin e shtëpisë e më vonë i çuan edhe dy granata.
