Tashmë gjithë Europa flet për të. Është djaloshi i artë. Pritet të ulë nga froni milionerët e futbollit, ndërkohë debutimi i djeshëm ishte debutim ëndrrash. Ktheu rezultatin për Dortmundin e tij duke shënuar tre gola dhe duke përmbysur një rezultat të vështirë.
Norvegjezi që la Salzburgu për ‘hirushen’ e Europës tashmë di pse e ka bërë atë zgjedhje. Erling Haaland pas ndeshjes foli për dy televizione duke treguar se ishte shumë i lumtur jo vetëm me ndeshjen por edhe me zgjedhjen.
Erling Haaland bëri një debutim të shkëlqyer me fanellën e Dortmundit. Sulmuesi norvegjez shënoi plot 3 gola, duke i dhënë dhe fitoren ekipit të tij.
Pas ndeshjes 19-vjeçari u ndal të flasë për mediat, ku u shpreh shumë i lumtur me këtë debutim. “Është e pabesueshme, çfarë debutimi! Jam shumë i lumtur që shënova dhe morëm tri pikët. Ishte e rëndësishme të fitonim, pasi vetëm kështu do të jemi më pranë objektivave sezonalë. Nuk dua të ndalem më, jam i lumtur”, tha Haaland për Sky Sport.
Ndërsa në televizionin norvegjez “ViaSat”, Haaland u shpreh se tashmë në pak javë ndjehet pjesë e atij ekipi.
“Është bukur, kjo është mënyra si duhet të jetë. Kanë kaluar vetëm disa javë që kur kam mbërritur dhe tashmë ndjehem si pjesë e ekipit. Atmosfera brenda skuadrës është e shkëlqyeshme. Gjithashtu dhe tifozët, ishte e jashtëzakonshme të luaje në një atmosferë të tillë.
“Kur unë dhe babai im vendosëm për këtë klub, ne po shikonim të gjithë lojtarët që mund të luanin me mua në sulm. Të gjithë këtu janë mjaft të talentuar,” përfundoi sulmuesi norvegjez. /Fjala.al/
