Ministra e Financave dhe Ekonomisë raporton se brenda 12 ditëve të para të janarit kanë gjetur punë 701 persona në të gjithë vendin. Numrin më të madh të të punësuarve e ka kryeqytetit, me 285 punësime. Shifrat janë bërë të ditur në ditarin javor të ministrisë. Në sektorin “Misioni ynë punësimi juaj” ministria bën të ditura shifrat e punësimit për të gjitha qarqet e vendit.
“701 persona janë punësuar në gjithë vendin nëpërmjet ndërmjetësimit të zyrave të Punës gjatë periudhës 4-16 Janar 2020. Numrin më të madh të të punësuarve e ka qarku i Tiranës me 258 persona, i ndjekur nga qarku i Durrësit me 87 persona, qarku i Vlorës me 72 persona, qarku i Fierit me 48 persona, qarku i Elbasanit me 44 persona etj”-thuhet në raport.
Sipas INSTAT gjatë tremujorit të tretë të vitit 2019, shkalla e punësimit për popullsinë 15-64 vjeç është 61,5 %. Ritmi vjetor i rritjes së punësimit për popullsinë 15 vjeç e lart, nga tremujori i tretë i vitit 2018 në tremujorin e tretë të vitit 2019, është 3,3 %. Në terma vjetorë, rritja e punësimit sipas sektorëve kryesorë të ekonomisë është 6,0 % në sektorin e industrisë, 4,8 % në sektorin e shërbimeve dhe 0,2 % në sektorin e bujqësisë. Krahasuar me tremujorin e mëparshëm, në tremujorin e tretë 2019, punësimi për popullsinë 15 vjeç e lart u rrit me 0,3 %. Punësimi pësoi rritje në sektorin e industrisë me 1,9 %, pati ulje të lehtë në sektorin e shërbimeve me 0,2 %, ndërkohë që sektori i bujqësisë mbeti në të njëjtin nivel.
