Nga shtrati i Spitalit Ushtarak ku gjendet që prej mbrëmjes së djeshme, e plagosura Afërdita Laze ka treguar pak detaje nga grabitja e dhunshme që ndodhi në shtëpinë e saj. Ajo ka mundur të japë detajet e para për oficerët e policisë gjyqësore të cilët po grumbullojnë të dhëna për të hetuar ngjarjen e rëndë që për pak sa nuk iu mori jetën.
Ajo iu ka thënë hetuesve se grabitësit dukeshin të rinj dhe se nuk flisnin asnjë fjalë tjetër vetëm; lekët, lekët! Gjithashtu gruaja ka dhënë edhe disa fakte mbi llojin e të folurit, theksin dhe karakteristika fizike. Policia në bazë të përshkrimit të saj ka nisur punën për të kryer identikitet paraprake të agresorëve.
Dëshmia
“Ishim në dhomë dhe dëgjuam zhurma. I pari doli Petriti. Ai nxori kokën te shkalla të shihte se kush ishte. Më pas ulëriti vajza: kush është aty? Menjëherë ata u gjendën në korridor dhe u përplasën me Petritin. I drejtuan pistoletën dhe i thanë-lekët, lekët…! Dukeshin të rinj dhe vetëm kërkonin lekët. Petriti tentoi t`i nxirrte jashtë nga shtëpia,. Ata e qëlluan me armë Kur u afrova edhe mua më qëlluan dhe më pas ikën me vrap. Unë doja të kapja Petritin që të mos e qëllonin më por ata nuk ngurruan të më qëllonin edhe mua”!
Dyshimet
Duke iu referuar të dhënave të para që lidhen me ngjarjen e rëndë që ndodhi në familjen Laze në Allias, policia ka nisur edhe shoqërimin e të gjithë personave të njohur të çiftit. Po ashtu, mësohet se janë të gjithë punonjësit e tyre që do të pyeten ndërkohë që u janë shoqëruar një pjesë e mirë e familjarëve që kanë karakteristika të ngjashme me ‘maskat’.
Sipas të dhënave të policisë dëshmitë kanë treguar se bëhet fjalë për dy persona që kanë patur njohje perfekte fotografike të shtëpisë, njohje kjo që ka çuar edhe në dyshimet e para. Burimet konfidenciale tregojnë se janë të shumtë personat e shoqëruar, të cilët kanë njohje me rrethanat në të cilat funksionin biznesi i çiftit.
Burimet sqarojnë se kati i parë i banesës shërbente edhe si punishte, çka do të thotë se shtëpia e tyre ka qenë e ekspozuar edhe para personave të tjerë që nuk kanë patur lidhje pune apo biznesi me familjen Laze. n.k/ Fjala.al/
