Seri e frikshme ngjarjesh të rënda kriminale kanë pushtuar vendin këto ditë. Përveç atentatit që ndodhi mbrëmë në zonën e Astirit, ku në një atentat iu mor jetë një të riu, policia njofton një tjetër ngjarje të rëndë që ka ndodhur mbrëmë po në Tiranë.
Sipas të dhënave nga një sherr mes dy personave, në afërsi të shinave të trenit në zonën e Laprakës, një 19 vjeçar ka goditur me thika një 37-vjeçar.
Sipas burimeve bëhet me dije se i plagosuri është në gjendje kritike për jetën ndërkohe që autori është vënë në pranga. Hetimet kanë hedhur dritë mbi konfliktin mes tyre që lidhet me një sherr për një borxh që pretendonte i riu, por policia ka nisur verifikimin e një sërë dëshmish që janë dhënë mbrëmë në ambientet e Spitalit Ushtarak!
Policia njoftoi sot se: Një 37-vjeçar ka mbetur i plagosur rëndë pasi është goditur disa herë me thikë. Ngjarja e rëndë ndodhi mbrëmë tek shinat e trenit, rreth orës 20:05. Burime zyrtare nga policia thanë se për motive të dobëta 19-vjeçari me inicialet A.H., ka goditur disa herë me një mjet shpues e prerës shtetasin I. Z., banues në Tiranë, i cili ndodhet në gjendje të rëndë për jetën.
Shërbimet e Komisariatit të Policisë Nr. 3, pas marrjes së njoftimit për ngjarjen, kanë shkuar menjëherë në vendngjarje dhe pas rreth dy orë kërkimesh dhe kontrollesh në zonë, bënë të mundur gjetjen, kapjen dhe arrestimin e 19-vjeçarit. Materialet do t’i kalojnë Prokurorisë së Rrethit Gjyqësor Tiranë, për veprën “Plagosja e rëndë me dashje”. n.k/Fjala.al/
