Adoleshentët po shmangin punët dixhitale dhe po aspirojnë të punojnë në profesionet më të njohura tradicionale – si mësues, mjekë ose veterinerë – megjithë ndryshimet e mëdha që kanë ndodhur në fushën e punësimit, sipas një studimi global të zhvilluar së fundmi.
Pritshmëritë e karrierës së të rinjve janë përqendruar në më pak profesione gjatë dy dekadave të fundit pavarësisht zhvillimit të mediave sociale dhe teknologjisë , sipas një raporti të Organizatës për Bashkëpunim Ekonomik dhe Zhvillim (OECD).
Profesionet tradicionale nga shekujt XIX dhe XX, të tilla si avokatët dhe oficerët e policisë, vazhdojnë të kapin imagjinatat e të rinjve në të gjithë botën, siç ndodhte gati 20 vjet më parë. Gati gjysma e të rinjve në mbarë botën aspirojnë të punojnë në 10 nga profesionet më të zakonshme.
Andreas Schleicher, drejtor i arsimit dhe aftësive të OECD, tha: “Sondazhet tregojnë se shumë adoleshentë nuk kanë dijeni për llojet e reja të vendeve të punës që po shfaqen, veçanërisht si rezultat i dixhitalizimit.”
“Është një shqetësim i vërtetë që shumë të rinj po zgjedhin punën e tyre të ëndrrave nga një listë e vogël e profesioneve më të njohura, tradicionale, si mësuesit, avokatët ose menaxherët e biznesit,” tha ai.
Raporti zbuloi se midis djemve dhe vajzave që janë të talentuar në shkencë, djemtë kanë më shumë gjasa të punojnë në shkencë dhe inxhinieri.
10 profesionet e para të cituara nga djemtë kanë ndryshuar shumë pak që nga viti 2000 – por vajzat tani kanë më shumë gjasa të duan të jenë arkitekte, oficere policie dhe dizajnere më shumë sesa parukiere, shkrimtare apo sekretare./Fjala.al/Burimi: The Indipendent
