Analisti Fatos Lubonja thekson se kryeministri Edi Rama është duke përdorur kancelaren gjermane Angela Merkel për interesat e tij politike.
Sipas Lubonjës, kreu i qeverisë e ka vendosur Merkelin në funksion të idesë se edhe ajo është pro hapjes së negociatave me Bashkimin Evropain si dhe pro ‘Mini-shengenit’.
Duke iu referuar qëndrimit të kancelares gjermane lidhur me reformën në drejtësi që po bën Shqipëria, Lubonja shpjegon se Gjermania e vendos Shqipërinë në një kontekst gjeopolitik se sa në kontekstin e realizimit sipas standardeve të kësaj reforme.
“Takimi, përveç tërmetit, lidhet dhe me një temë tjetër, atë të hapjes së negociatave. Sipas Ramës, Gjermania dhe Merkel është pro negociatave, ‘Mini-Shengenit’ ballkanik, që na fut në debatet që ai ka pasur me Haradinajn.
Mendimi im për çështjen e negociatave është ky; hapen apo nuk hapen, pak janë shanset që të ndërrojnë gjerat në Shqipëri. Edhe mund të ketë shans që të hapet procesi i negocimit për hyrje në Europë. Turqia i ka hapur me dekada më përpara dhe ende nuk është bërë pjesë e BE. Ky është problemi nëse do bëhemi apo jo.
Për arsye gjeo-politike sot duket se ka ndryshim qëndrimi tek Franca. Të shohim se ça do ndodh në Kroaci. Janë ndryshime që nuk mendoj se duhen matur me peshoren e asaj nëse kemi bërë suksese apo jo suksese.
Ato do t’i matim ne më shumë se sa gjermanet. Më bëri përshtypje që Merkel në konferencën e fundit ka thënë se; Ne çmojmë reformën në drejtësi. Unë mendoj se reforma në drejtësi nuk është histori suksesi, por dështimi dhe mashtrimi.
Për arsye gjeopolitike i duhet dhe Merkel që të thotë se është histori suksesi, apo ka dezinformim. Edhe opozita jonë nuk është e qartë në këtë proces. Mbetet e hapur çështja”, u shpreh Lubonja për News 24.
Ai komentoi edhe fjalimin e parë të ambasadores së re amerikne në Shqipëri, Yuri Kim duke thënë se SHBA dhe Perëndimi kryesisht e shohin Shqipërinë në rrafshin gjeopolitik dhe do të tregojë koha se sa SHBA do të angazhohet në mënyrë fondamentale për demokracinë në Shqipëri./Fjala.al/
