Presidenti Meta ka reaguar në lidhje me takimin diplomatik që kryeministri ka bërë me kancelaren Angela Merkel për konferencën e donatorëve, pas tërmetit shkatërrimtar të 26 nëntorit. Meta ka përshëndetur angazhimin në kuadër të çeljes së negociatave të anëtarësimit të Shqipërisë në Bashkimin Europian.
Ajo çfarë bie në sy është se presidenti ka publikuar në Facebook foton e kryeministrit me kancelaren Merkel. Ai shton se zbatimi i 9 kushteve të Bundestagut me rezultate të prekshme dhe të qëndrueshme, janë harta më e sigurt e rrugës europiane të Shqipërisë.
“Përshëndes angazhimin e përsëritur të Kancelares Angela Merkel për çeljen e negociatave të anëtarësimit ndërmjet Shqipërisë dhe Bashkimit Europian. Zbatimi i 9 kushteve të Bundestagut me rezultate të prekshme dhe të qëndrueshme, janë harta më e sigurt e rrugës europiane të Shqipërisë!”, -shkruan Meta./Fjala.al
