Felicia Sonmez, gazetare e The Washington Post, është pezulluar nga puna pasi publikoi në ‘Twitter’ një lajm ku Kobe Bryant akuzohej për përdhunim.
Bëhej fjalë për një shkrim të publikuar më shumë se tre vite më parë nga një tjetër media dhe që i referohej akuzave të bëra në 2003-in ndaj basketbollistit nga një 19 vjeçare.
Publikimi i gazetares u bë pak orë pasi ishte konfirmuar vdekja e legjendës së NBA nga një aksident me helikopter.
Pezullimi i Felicia Sonmez është konfirmuar për ‘DailyMail’ nga Tracy Grant, redaktori drejtues i The Washington Post, i cili tha se po shqyrtohet nëse postimet e gazetares për vdekjen e Kobe Bryan “kanë shkelur politikën e mediave sociale të redaksisë së The Washington Post”.
Pas publikimit të lajmit, Sonmez mori mbi 10 mijë mesazhe kërcënuese, ndërsa disa minuta më vonë e fshiu postimin nga ‘Twitter’.
Kobe Bryant dhe vajza e tij 13 vjeçare humbën dje jetën gjatë një aksidenti me helikopter. 7 persona të tjerë humbën gjithashtu jetën nga përplasja.
