Ngjarja e rëndë që tronditi Kosovën mbrëmjen e djeshme ka sjellë detaje të frikshme për grupin e hetimit. Sipas të dhënave, punonjësi i policisë anti-drogë Sami Thaçi bashkë me dy kolegë të tij kanë patur informacion se në shtëpinë e shtetasit I.B, në fshatin Zhur të Prizrenit ka patur brenda lëndë narkotike. Ata kanë lajmëruar se janë ‘policia’ dhe se kanë autorizim për një kontroll banese, por në pragun e derës ka ndodhur një shpërthim i fuqishëm, për pasojë Thaçi ka humbur jetën në vend ndërsa dy kolegët e tij janë plagosur. Plagë ka marrë edhe një fëmijë i familjes.
Por referuar të dhënave që vijnë nga policia e Kosovës mësohet se personi që ishte i dyshuar si posedues droge, dyshohet se ka vendosur në pragun e derës një sasi eksplozivi për tu shpërthyer në momentin që duhej të vinte policia. Të paktën ky është versioni i parë që vjen nga policia e Kosovës që po merret intensivisht me hetimet për rastin e frikshëm. Burimet tregojnë se ka edhe dyshime të tjera që po hetohen, ndërkohë mësohet se lënda narkotike kishte kaluar nga Shqipëria. Bëhet fjalë për një ngarkesë marijuane, e cila më pas nuk është gjendur në banesën që ishte pikasur për kontroll.
Për rastin e Zhurit, mësohet se ka reaguar edhe Ramush Haradinaj, i cili ka kërkuar zbardhjen me çdo kusht të ngjarjes së rëndë duke thënë se: Askush nuk duhet të guxojë të prekë djemtë dhe vajzat e Kosovës me uniformë! I dyshuari do të jetë edhe personi që do të hedh dritë mbi këtë akt thuajse mafioz, i cili është parë vetëm në Italinë e viteve ’70! n.k/Fjala.al/
