Kryetari i PD Lulzim Basha pati një ditë të ngjeshur me takime në seline blu, mes tyre me ambasadoren e SHBA Yuri Kim, dhe delegacionin e KIE.
Përmes një postimi në Facebook Basha shkruan se ambasadorja do të ketë bashkëpunimin e opozitës me të gjitha angazhimet e vendit ndaj ShBA, e cila do të mbetet një aleat strategjik i Shqipërisë.
“Kënaqësi e veçantë të mirëpres Znj. Yuri Kim, Ambasadoren e SHBA, aleatit dhe partnerit tonë strategjik.
E urova Ambasadoren Kim për detyrën e re dhe e sigurova atë për bashkëpunim të plotë të opozitës në përmbushjen e të gjithë angazhimeve të vendit tonë me SHBA.
Ndava me të pikëpamjet për zhvillimet e fundit në Shqipëri dhe e garantova për angazhimin e plotë dhe serioz të PD në zbatimin e reformave dhe zgjidhjen e krizës politike.
Shtetet e Bashkuara të Amerikës do të vazhdojnë të jenë në krah të popullit shqiptar ashtu siç kanë bërë gjatë gjithë historisë së marrëdhënieve të shkëlqyera mes dy vendeve tona”, shkroi Basha në Facebook.
Ndërkohë edhe Ambasada Amerikanë ka reaguar për këtë takim në faqen e saj zyrtare në Facebook.
“Gjatë takimit të saj sot me Kryetarin e Partisë Demokratike Lulzim Basha, Ambasadorja Kim nxiti të gjitha palët të qëndrojnë në tryezë dhe të përfundojnë një kod zgjedhor.
Ambasadorja gjithashtu konfirmoi mbështetjen e Shteteve të Bashkuara për institucionet dhe praktikat demokratike në Shqipëri”, thuhen në njoftimin e ambasadës.
