Skuadra e Besëlidhjes mund të konsiderohet si surpriza më e madhe e Kupës së Shqipërisë. Është përsëritur historia e katër viteve më parë dhe kjo skuadër ka eliminuar kampionët e Shqipërisë, Partizanin.
Skuadra e drejtuar nga trajneri italian Adolfo Sormani nuk ka mundur që të përmbysi rezultatin e kavajasve, pasi takimi i kthimit është mbyllur me rezultatin 3-1 për të kuqtë e kryeqytetit, ndërsa ndeshja e parë u mbyll me 3-0 për Besëlidhjen. “Demat” kaluan në disavantazh që në minutën e 5-të të lojës, ndonëse më pas Bruno Telushi shënoii plot tre herë te porta e kundërshtarëve nuk u arrit që të kualifikoheshin.
Ndërsa skuadra e trajnerit Emanuel Egbo, Tirana ia ka dalë që të marrë një triumf të vërtetë në ndeshjen ndaj Kastriotit, të cilën e ka fituar me rezultatin 4-0, duke kaluar në çerekfinale.
Skuadra të tjera që u kualifikuan janë Kukësi që fitoi 3-0 ndaj Lushnjës, Skënderbeu mori fitoren 1-0 ndaj Besës, Vllaznia kaloi në fazën tjetër me rezultatin 2-0 ndaj Flamurtarit të Vlorës, ndërsa Teuta mbaroi ndeshjen 3-1 ndaj Erzenit.
Apolonia ashtu si Besëlidhja mund të konsiderohet surprizë e kësaj faze, pasi arriti të kualifikohet pas ndeshjes me Luftëtarin, të cilën e fitoi me rezultatin 3-0.
Ndërkohë Bylisi ia ka dalë që të kalojë supersfidën e kësaj faze të kupës duke mundur Laçin me rezultatin 4-3./Fjala.al/Katerina Tafa/
