Jep dorëheqjen drejtori i spitalit të Kavajës Përparim Daiu. Burimet nga Kavaja bëjnë të ditur se vendimi ka ardhur për shkak të debateve brenda Partisë Socialiste dhe jo për diskutimet mbi hapjen e karantinës në Spitalin e Kavajës.
Vetë Daiu nuk i ka bërë të ditura arsyet e këtij vendimi, por Kavaja dhe spitali i këtij qyteti janë përfolur këto ditë si vende të mundshme për karantinë, nëse do ketë raste me koronavirus në Shqipëri.
Ai ka reaguar vetëm pak orë pas dhënies së dorëheqjes. Ai thotë se ky vendim nuk ka lidhje me karantinën por me debatet që janë bërë në Bashki. Madje Daiu hodhi poshtë edhe faktin që të jetë lajmëruar për ndonjë vendim të tillë që lidhet me krijimin e ndonjë karantine në spitalin që ai drejtonte!
“Unë skam marrë asnjë urdhër për ngritje karantine. Dorëheqja ime s`ka të bëjë me këtë fakt por me një debat me kryebashkiakun e Kavajës”! Sipas të dhënave mësohet se mes tij dhe kryebashkiakut Redjan Krali ka patur debate të ashpra por se nuk dihet se konkretisht çfarë i ka përplasur dy drejtuesit njëri me tjetrin.
Dy ditë më parë ndërsa kishte shpërthyer frika e ardhjes së virusit vdekjeprurës në vendin tonë, një nga masat që u pretendua se kishte marrë qeveria thuhej se ishte edhe ngritja e një karantine në një spital. Më pas u pretendua se ky spital do të ishte ai i Kavajës dhe menjëherë pati reagime të forta që të mos lejohej diçka e tillë.
Më pas u shuan të gjithë zërat nëpërmjet reagimeve të ndryshme nga zyrtarë të lartë të ministrisë së Shëndetësisë, por dorëheqja e sotme ka kthyer sërish vëmendjen në këtë pretendim të para dy ditëve. n.k/Fjala.al/
