Duket se skuadra e Kukësit nuk do të vazhdojë me Skendër Gegën në pankinë. Janë të dhëna të tjera që kanë bërë me dije se në fakt trajneri i ri i Kukësit, sipas preferencave të presidentit gjendet në Spanjë dhe ai është një emër i njohur i futbollit në vend. Përgjatë gjithë ditës së sotme është pritur prezantimi i Gegës po në njoftim të klubit gjërat kanë ndryshuar. Dhe për pak ditë këtë skuadër do e drejtojë përkohësisht Rrahman Hallaçi derisa trajneri i ri të kthehet nga trajnimi.
Kështu Skënder Gega dhe Kukësi ndalen sërish tek detajet, ish-trajneri i Partizanit dhe klubi verilindorë nuk arrijnë të konkretizojnë me një marrëveshje zyrtare negociatat që nisën menjëherë pas shkarkimit të Shpëtim Duros. Prezantimi i Gegës ishte programuar për këtë të diel në orën 16:00, prezantim i cili do të bëhej nga vetë presidenti i nderit, Safet Gjici.
Urdhër i dytë shfuqizon të parin dhe me një njoftim për mediet, klubi i Kukësit ka njoftuar se trajneri i ri nuk do të prezantohet por ekipin do ta drejtoj provizorisht Rrahman Hallaçi. Ish-kapiteni rikthehet shumë shpejt në klubin ku arriti gjithçka, një ikonë që qetëson tifozët.
Janë disa burime, jo zyrtare që bëjnë me dije se trajneri i ri i Kukësit do të jetë Orges Shehi, të paktën kjo është preferenca e parë e presidentit Gjici. Nëse gjëra nuk ndryshojnë në momentin e fundit, ashtu siç ndodhi dhe me Gegën, prezantimi i Shehit do të bëhet menjëherë sapo ish-trajneri i Skënderbeut të kthehet në Shqipëri. n.k/Fjala.al/
