Votuesit francezë u nxitën sot të dilnin dhe të votonin në raundin e parë të zgjedhjeve lokale, disa orë pas mbylljes kombëtare të të gjitha dyqaneve dhe shërbimeve jo thelbësore.
Pavarësisht thirrjeve që votimi dy raundësh të shtyhej, për shkak të epidemisë së koronavirusit, qendrat e votimit u hapën sikurse ishin planifikuar.
Votuesit u këshilluan të mbanin distancë rreth 1 metër larg, të merrnin me vete lapsa, si dhe të dezinfektonin duart para se të shënonin në fletën e tyre të votimit. Përparësi iu dha votuesve të moshuar.
Në mesditë pjesëmarrja u shënua 18.38%, 5 përqind më ulët se gjatë zgjedhjeve të fundit lokale në 2014-ën.
Philippe votoi nga Le Havre, ku po qëndron për zgjedhjen si kryetar. Në Paris, ish presidenti Nicolas Sarkozy dhe kryetarja aktuale e qytetit, Anne Hidalgo, ishin ndër të parët që votuan. Ndërsa presidenti Emmanuel Macron votoi gjatë drekës në qytetin e tij të lindjes, në Le Touquet.
Një nga betejat më të kontestuara lokale është në Paris, ku sondazhet e opinioneve tregojnë se socialisti Hidaldo mbetet i preferuar, i ndjekur nga kandidatja kryesore e së djathtës Rachida Dati.
Rreth 47.7 milion njerëz, përfshirë 330,000 qytetarë nga vendet e tjera të BE që jetojnë në Francë, kanë të drejtë të votojnë. Përjashtim bëjnë britanikët, të cilët nuk mund të votojnë që nga largimi i Mbretërisë së Bashkuar nga Bashkimi Evropian (31 janar).
Raundi i dytë i zgjedhjeve lokale do të mbahet të dielën e ardhshme.
Fjala.al
