Kosova ka shpallur gjendjen e jashtëzakonshme si pasojë e situatës emergjente të krijuar nga koronavirusi.
Pas mbledhjes me Këshillin e Sigurimit, presidenti Hashim Thaçi i është drejtuar deputetëve, të cilëve iu ka kërkuar që të ratifikojnë dekretin për shpalljen e gjendjes së jashtëzakonshme.
Thaçi e ka bërë të ditur firmosjen e dekretit për shpalljen e gjendjes së jashtëzakonshme përmes një postimi në profilin e tij zyrtar në Twitter.
“Bazuar në detyrat e mia kushtetuese si President, pas takimit të sontëm me Këshillin e Sigurimit të Kosovës, kam nënshkruar një dekret për të shpallur gjendjen e jashtëzakonshme në mes të situatës së krijuar nga shpërthimi i # COVID19. Unë i bëj thirrje parlamentit të bashkohet e ta ratifikojnë atë”, ka shkruar presidenti.
Nga ana tjetër, zëvendëskryeministri i Kosovës, Haki Abazi është shprehur se kryeministri Albin Kurti nuk është dakord që të shpallet gjendja e jashtëzakonshme.
Megjithatë, situata duket e rënduar edhe në Kosovë, kur deri më tani janë konfirmuar 19 raste me koronavirus.
Based on my constitutional duties as President, after tonight’s meeting w/ the Security Council of Kosovo, I signed a decree to declare the State of Emergency amid the situation created by the #COVID19 outbreak. I call on the Parliament to get united & to ratify it. pic.twitter.com/yrXZgWXMQT
— Hashim Thaçi (@HashimThaciRKS) March 17, 2020
