Kryeministri italian Giusepe Conte dhe tetë liderë të tjerë evropianë, duke përfshirë presidentin francez Emmanuel Macron, kërkojnë krijimin e “Koronabonds” për t’u përballur me krizën ekonomike të shkaktuar nga pandemia Covid-19.
Italia, Spanja, Franca, Portugalia, Sllovenia, Greqia, Irlanda, Belgjika dhe Luksemburgu kanë nënshkruar një letër të përbashkët drejtuar presidentit të Këshillit të Evropës, Charles Michel, që në thelb kërkon marrjen e masave urgjente për të luftuar emergjencën e koronavirusit.
Liderët evropianë kërkojnë një instrument të përbashkët borxhi për investime të nevojshme në sistemet shëndetësore dhe politikat e përkohshme që synojnë mbrojtjen e ekonomisë dhe modelit shoqëror.
“Ne kemi nevojë për një instrument të përbashkët borxhi. Ne duhet ta njohim seriozitetin e situatës dhe nevojën për reagim të mëtejshëm për të forcuar ekonomitë tona sot. Kjo kërkon aktivizimin e të gjitha instrumenteve të nevojshme fiskale në mbështetje të përpjekjeve kombëtare për të garantuar solidaritetin financiar, veçanërisht në Eurozonë”-shkruajnë fillimisht liderët evropianë.
“Në veçanti, ne duhet të punojmë në një instrument të borxhit të përbashkët të lëshuar nga një institucion i BE-së për të mbledhur burime në treg në të njëjtat themele dhe për të mirën e të gjitha shteteve anëtare, duke garantuar kështu një financim të qendrueshëm dhe afatgjatë të politikave që synojnë luftimin e dëmit të shkaktuar nga kjo pandemi”-vijohet në letër.
“Ka mjaft arsye të vlefshme për ta mbështetur këtë propozim, pasi të gjithë jemi duke u përballur me një tronditje ekzogjene simetrike, për të cilën asnjë vend nuk është përgjegjës, por pasojat negative të të cilave peshojnë mbi të gjithë. Ky instrument i përbashkët i borxhit do të duhet të jetë i mjaftueshëm dhe afatgjatë në mënyrë që të jetë plotësisht efektiv dhe të shmangë rreziqet e rifinancimit tani dhe në të ardhmen”-përfundojnë liderët evropianë.
Fjala.al
